სახლში პასკის (კულიჩის) გამოცხობა მთელი რიტუალია. გარდა იმისა, რომ სახლში გამომცხვარი უფრო გემრიელია, ამ დროს დღესასწაულის შეგრძნებაც უფრო იმატებს.
ჩვენი გვერდის ერთ-ერთმა მკითხველმა, თამარ ჭელიძემ, პასკის ცხობის შესახებ საკუთარი რჩევები და გამოცდილება გაგვიზიარა, რომელსაც თქვენც გთავაზობთ:
1. პასკას რომ უფრო ინტენსიური ყვითელი ფერი ჰქონდეს, ამისათვის ცოტაოდენ ზაფრანას წინა დღით დავასხამთ მდუღარეს და ამ ნაყენს დავუმატებთ ცომში.
2. ასევე, უფრო მეტი ყვითელი შეფერილობისთვის, კვერცხის გულებს აუცილებლად უნდა დაემატოს 1 ჩაის კოვზი მარილი.
3. ქიშმიში რომ ცომს კარგად მიეწებოს და არ "ჩაიძიროს" პასკაში, აუცილებლად უნდა "ამოვსვაროთ" ფქვილში.
4. სანელებლებს რომ უკეთ გამოუვიდეს არომატი, წინასწარ, სანამ სხვა რამეს მოამზადებთ, ცხელი რძე დაასხით ჭიქაში, გააჩერეთ და შემდეგ დაუმატეთ ცომს.
5. არ გამოიყენოთ ბევრი საფუარი! 6-7-კვერცხიან პასკაზე 50-60 გრ სველი კარგი საფუარი სავსებით საკმარისია. შედარებით ნელა ამოვა, სამაგიეროდ, პასკა არ გამოშრება.
6. საფუვრის შესამოწმებლად, სანამ ოპარას მომზადებას დაიწყებთ, ჯერ ის მხოლოდ თბილ რძეში გახსენით. დაელოდეთ 10-15 წთ. თუ კარგად ამოვა, ე.ი. კარგია.
7. პასკის ცომს აუცილებლად უნდა ძალიან დიდი ხანი ზელვა. უნდა ზილოთ მანამ, სანამ ცომი თითებს თავისით არ მოსცილდება! ამან შეიძლება 1 საათამდეც კი წაიღოს, გააჩნია, რამდენკვერცხიანი ცომი გაქვთ.
8. პასკას რომ ლამაზი მრგვალი თავი ჰქონდეს, ფორმაში ჩასადებად მოწყვეტილი ცომი ხელში ისე უნდა დავამუშაოთ, რომ ნაოჭებიანი მხარე ფორმის ქვედა მხარეს მოექცეს და მრგვალი მხარე - ზედაპირზე.
9. იტალიურ პანეტონეს ლამაზ მრგვალ თავზე პატარა ჯვარს უკეთებენ ბასრი დანით, რის გამოც ის შუაში ლამაზად და სიმეტრიულად იშლება.
10. თითოეულ ფორმაში იმდენი ცომი უნდა ჩადოთ, რომ არ შეივსოს ფორმის 1/3-ზე მეტი.
იხილეთ სრულად: gemrielia.ge