ბავშვები თვლიან, რომ იდეალური დედა აცხობს გემრიელ კექსებს, უფლებას აძლევს მათ, ამოიგანგლონ ჭუჭყში და თამაშობს მათთან ერთად მინიმუმ ნახევარი საათის განმავლობაში. კიდევ რას უნდა აკეთებდეს მსოფლიოში საუკეთესო დედა, შვილების აზრით, ამას ახლავე მოგახსენებთ.
ბავშვების უმეტესობას სურს, რომ დედა დიდ დროს ატარებდეს მათთან ერთად. სწორედ დედას და სხვას არავის დაჰყავდეს სკოლაში, არ ეჩხუბებოდეს იმისათვის, რომ ისევ დაისვარა მთელი ტანსაცმელი და აძლევდეს ტელევიზორის ყურების უფლებას, მიუხედავად იმისა, ცუდად მოიქცა ის თუ არა. ასეთი დასკვნები გამოიტანეს ბრიტანელმა სოციოლოგებმა მას მერე, რაც ექვსიდან თერთმეტ წლამდე ბავშვები გამოჰკითხეს.
როგორია, იყო სუპერდედა
კვლევის ინიციატორი კეტრინ კრაფვორდი ფიქრობს, რომ თანამედროვე დედები ძალიან რთულ მდგომარეობაში არიან, რადგან ისინი ცდილობენ მიუახლოვდნენ იმ იდეალს, რომელიც კინომ და ტელევიზიამ ჩაუნერგათ.
"ჩვენ გვგონია, რომ ყველაფერს ისე არ ვაკეთებთ, - განუცხადა The Daily Telegraph-ს კრაფვორდმა. – იმისათვის, რომ დედიკოებმა ამაზე აღარ ინერვიულონ, ჩვენ ჩავატარეთ კვლევა, რომელშიც ბავშვებს ვთხოვეთ, აღეწერათ იდეალური დედა. აღმოჩნდა, რომ იმისათვის, რომ მათი სურვილები დააკმაყოფილოთ, სულაც არ არის საჭირო რაღაც განსაკუთრებულის კეთება".
იდეალური დედა უნდა...
ატარებდეს მეტ დროს შვილებთან (75%);
აძლევდეს უფლებას, დაეხმაროს ბავშვი საჭმლის კეთების დროს (60%);
ეხმარებოდეს საშინაო დავალებების მომზადებაში (73%);
უმზადებდეს სკოლაში წასაღებ ბუტერბროდებს (58%);
ყოველთვის აძლევდეს ტელევიზორის ყურების უფლებას (71%);
ხშირად სეირნობდეს შვილებთან ერთად პარკში (54%);
უყვარდეს თამაში (69%);
აწვენდეს შვილებს დასაძინებლად (66%);
მაშინვე იქ ჩნდებოდეს, როგორც კი შვილი დაუძახებს (51%);
იყოს შვილის გვერდით, როცა ის ცუდად გრძნობს თავს (65%);
რეცხავდეს ჭურჭელს და დახმარებას არ ითხოვდეს (49%);
აცხობდეს გემრიელ ნამცხვრებს (65%);
უკითხავდეს ძილის წინ წიგნს (63%);
მიჰყავდეს სკოლაში და ატარებდეს მეგობრებთან სტუმრად (43%);
ამჩნევდეს და იმჩნევდეს ყველა მის კარგ საქციელს (63%);
აძლევდეს უფლებას, გაუჩეჩოს თმა (42%);
უუთოებდეს ტანსაცმელს (62%);
აძლევდეს უფლებას, ითამაშოს ქვიშაში და დაისვაროს ტანსაცმელი (41%).