მას შემდეგ, რაც ცნობილია გახდა, რომ ხათუნა ჟორდანიამ სიმსივნე დაამარცხა, მისი სიხარული უამრავმა ადამიანმა გაიზიარა და ნაცნობი და უცნობი ადამიანებისგან ბევრი მილოცვაც მიიღო.
აღნიშნულ თემას ანიტა ფაცაციას ბებია თამუნა გლურჯიძე სოციალური ქსელით ეხმიანება და წერს, რომ მძიმე მომენტში ნინი ქარსელაძემ მათი ოჯახის დახმარების სურვილი გამოთქვა და როგორც შეეძლო დაეხმარა.
„დღეს წავიკითხე, რომ ხათუნა ჟორდანიამ მძიმე სენი დაამარცხა. განსაკუთრებით მას მერე, რაც გადავიტანე, ალბათ არ გაგიკვირდებათ, რომ მსგავს ბედნიერ ამბავს ზედმეტად ემოციურად ვიღებ და გულწრფელად მიხარია, რომ კიდევ ერთი ოჯახი გადარჩა იმ დიდ ტკივილს, რომლის ზიდვაც ძალიან, ძალიან ძნელია.
ამ პოსტს კი აი, რატომ ვწერ და მინდა ეს ბევრმა ადამიანმა იცოდეს:
ჩემი ანიტა ავად რომ იყო, იცით, რომ, კლინიკას ვეძებდით, რომელიც მიიღებდა და გულს გადაუნერგავდა. ჩაკეტილი წრე იყო, ყველა მხრიდან უარი მოდიოდა. გამოუვალ მდგომარეობაში აღმოვჩნდით. ასეთ დროს ალბათ ძნელი წარმოსადგენი არ არის, რომ ერთი თბილი და იმედიანი სიტყვაც ძალიან ბევრს ნიშნავს. გულს ის მიკეთებდა, რომ უამრავი ადამიანი მიკავშირდებოდა და ვისაც რაზეც მიუწვდებოდა ხელი, იმ ინფორმაციას მაწვდიდა იმ იმედით, რომ ეს რაიმეში მაინც წაგვადგებოდა. ერთხელაც „ფეისბუქზე“ ნინი ქარსელაძემ მომწერა, მითხრა, რომ ეცდებოდა, რითიც შეძლებდა დამეხმარებოდა. მაშინ მისგან გავიგე მისი დედიკოს ამბავი. ერთ ბედს ქვეშ ვიყავით – უსაყვარლესი ადამიანების სიცოცხლის გადასარჩენად ვიბრძოდით. მიუხედავად ამისა, ნინიმ გამონახა დრო და ცდილობდა, ანიტასაც დახმარებოდა საავადმყოფოს მოძიებაში. რაღაც პერიოდი ვკონტაქტობდით, მერე ისე მოხდა, რომ უამრავი ადამიანის მოწერილს შორის ნინის ჩატი ვეღარ ვიპოვე და ასე დავკარგე.
ჰოდა, დღეს აქ მივულოცავ ამ დიდი გულის გოგოს დედიკოს გამოჯანმრთელებას და კიდევ ერთხელ გადავუხდი მადლობას იმისთვის, რომ მისთვის უმძიმეს დროს ჩემი გოგოსთვისაც იზრუნა, როგორც შეეძლო.
და მინდა თქვენც იცოდეთ, რომ ნინი, რომელსაც არც ვიცნობ, თუ იმ რამდენიმე დღის მიმოწერას არ ჩავთვლით, ასეთი საოცარი ადამიანია და მიხარია, რომ დღეს უკვე ბედნიერია დედიკოს კარგად ყოფნით…“