ვიღაცამ თქვა, სილამაზე მსხვერპლს მოითხოვსო და დანარჩენებმაც დაუჯერეს. სილამაზეს ზოგი მსხვერპლად თავის გემოვნებას და მადას სწირავს, შიმშილით იკლავს თავს და დიეტას ეძახის, მეორე ნაწილი კი ოფლად იღვრება, ვარჯიშობს, დარბის და მსხლის ფორმაში გადაცმულ საკუთარ კილოგრამებს ასე ებრძვის.
ზოგიც ამ საქმეს უფრო დიდი ენთუზიაზმით ეკიდება, თან დიეტაზე და თან ტრენეჟორებზე.
მე კი უბრალოდ:
- დილით ლიმონიან წყალს ვსვამ. რაც უფრო ცივია, მით უფრო მეტ ენერგიას ხარჯავს ორგანიზმი მის გასათბობად და სხეულის ტემპერატურამდე მისაყვანად. შესაბამისად, მეც ყინულიან-ლიმონიან წყალს "ვეძალები".
- შემდეგ ნახევარ ლიტრ ოთახის ტემპერატურის წყალს "ვაყოლებ" (აქაც სასურველია ცივი წყალი) და ჭამამდე ნახევარი საათით ადრეც წყლით "ვმარაგდები".
- ვჭამ საშუალოზე ოდნავ პატარა ზომის ლურჯ თეფშზე, რომელსაც ოჯახის წევრები "სათამაშოს" ეძახიან. მართალია, ისინი დამცინიან, მაგრამ მე ეს ფერი მადას მიკარგავს და 1 თეფშზე მეტს არასდროს მივირთმევ.
- არასდროს შევდივარ მშიერი მაღაზიაში. ვუფრთხილდები საფულის მოცულობასაც და საკუთარსაც...
- ძილის წინ ვსვამ უშაქრო ჩაის. ეს მე დაძინებაში მეხმარება, ორგანიზმს - გაწმენდაში.
- 8-ის მერე რომ არ ვჭამ, ამას ისედაც მიხვდებოდით. არც ცხიმიან და ცომიან საჭმელს ვეტანები...