როგორ იცვლება ქალის სხეული წლებთან ერთად - ყველაფერი, რაც საკუთარი თავის შესახებ უნდა იცოდეთ

დროთა განმავლობაში, ადამიანის მსოფლმხედველობა, შეხედულებები, სურვილები და მიზნები იცვლება. ეს თვალსაჩინოა და ხშირად ამაზე ხმამაღლაც ბევრს ვსაუბრობთ, მაგრამ თუ შეგიმჩნევიათ, როგორ იცვლება თქვენი სხეული და ორგანიზმი წლების მატებასთან ერთად? ეს საკმაოდ საინტერესო და საყურადღებო პროცესია, განსაკუთრებით, ისეთ საზოგადოებაში, სადაც იდეალური ფორმები, სიგამხდრე და სილამაზის სტანდარტები იდეალიზებულია. ამან შეიძლება შეამციროს თვითშეფასება და გამოიწვიოს სოციალური გათიშვა. თუმცა, თქვენი სხეულის ბუნებრივი დაბერების პროცესის აღქმა და გაგება დაგეხმარებათ დაძლიოთ ეს სირთულე.

• როგორ იცვლება თქვენი წონა ასაკთან ერთად

რა ემართება თქვენი სხეულის წონას ასაკთან ერთად? ასაკის მატებასთან ერთად ქალებისთვის შესამჩნევი ცვლილება არის სხეულის ცხიმის მატება. ხშირია კუნთების მასის დაქვეითება, რის გამოც თქვენი სხეული ნაკლებად ძლიერია, ვიდრე ახალგაზრდობაში. ქალებს ასევე შეიძლება განუვითარდეთ ნაოჭები მათი კანის შემცირებული ელასტიკურობისა და სიმკვრივის გამო, ან თხელი და ნაცრისფერი თმა. მიუხედავად იმისა, რომ მამაკაცები ხშირად წყვეტენ სხეულის ცხიმის მატებას დაახლოებით 55 წლის ასაკში, წონის მატება ქალებში გრძელდება 65 წლამდე, უპირველეს ყოვლისა, იმის გამო, რომ მეტაბოლიზმი ნელდება ასაკთან ერთად, რაც ართულებს წონის შენარჩუნებას ან დაკლებას 60 წლის შემდეგ.

კვლევებმა აჩვენა, რომ მუცლის არაჯანსაღი ცხიმი ასოცირდება ანთებასთან, გულის დაავადებებთან და დიაბეტთან. თუმცა, ამის თავიდან აცილება შეგიძლიათ ჯანსაღი კვებით და ვარჯიშით თქვენი წონის სამართავად, რაც განსაკუთრებით მნიშვნელოვანია ასაკის მატებასთან ერთად. თქვენ უნდა შეინარჩუნოთ ფიზიკური აქტივობა დღეში 30 წუთის განმავლობაში. უმჯობესია იყოთ აქტიური კვირაში მინიმუმ სამი დღე. ასევე, კვირაში მინიმუმ ორი დღე, ჩართეთ კუნთების გამაძლიერებელი აქტივობები, როგორიცაა სიმძიმეების აწევა ან ჩაჯდომის გაკეთება. აქტივობები წონასწორობის გასაუმჯობესებლად, როგორიცაა იოგა, ტაი ჩი და წონასწორობის პოზები, როგორიცაა ხის პოზა (ერთ ფეხზე დგომა).

• როგორ იცვლება თქვენი კუნთები და ძვლები ასაკთან ერთად

უმეტესობა ჩვენგანი კარგავს მნიშვნელოვან კუნთოვან მასას ასაკთან ერთად, რაც იწვევს ძალისა და გამძლეობის შემცირებას. მიუხედავად იმისა, რომ გარკვეული დანაკარგი დაკავშირებულია ნორმალურ დაბერებასთან, სხვა ფაქტორები ხელს უწყობს აქტივობის დაქვეითებას, მადის ნაკლებობას და ქრონიკული დაავადებების განვითარებას. ასაკთან ერთად, ცვლილებები მიმდინარეობს ძვლებშიც და როდესაც სახსრის ქსოვილები იშლება, შეიძლება განვითარდეს ართრიტი.

ძვლის სიმკვრივე იზრდება სქესობრივი მომწიფებიდან 30 წლამდე, განსაკუთრებით, რეგულარული ვარჯიშით და D ვიტამინით და კალციუმით მდიდარი საკვებით.

რაც უფრო თხელი და ფოროვანი ხდება თქვენი ძვლები, მოტეხილობის რისკი იზრდება. ოსტეოპოროზის ეროვნული ფონდი რეკომენდაციას უწევს ქალებს ძვლის სიმკვრივის სკრინინგს 65 წლიდან.

კუნთების არასაკმარისი დატვირთვა აჩქარებს კუნთებისა და ძვლების განლევას და შედეგად სისუსტემ შეიძლება გამოიწვიოს არაერთი დაავადება. ამის თავიდან ასარიდებლად ივარჯიშეთ, შეიტანეთ თქვენს რაციონში საკმარისი კალციუმი ნუშის, რძისა და ბოსტნეულის სახით. ექიმის რეკომენდაციით შესაძლებელია დანამატების მიღებაც.

• როგორ იცვლება თქვენი მკერდი ასაკთან ერთად

ქალის მკერდი იცვლება ცხოვრების ეტაპებთან ერთად, როგორებიცაა, პუბერტატი და ორსულობა. როდესაც ესტროგენის დონე იკლებს მენოპაუზის დროს, მკერდი ხდება ნაკლებად სავსე და ელასტიკური, რაც იწვევს „ჩამოვარდნას“.

ძუძუს კიბოს რისკი ასევე იზრდება ქალების ასაკთან ერთად, იტყობინება კიბოს ეროვნული ინსტიტუტი. 30-40 წლის ქალებში ძუძუს კიბოს განვითარების რისკი 0.5%-ია, ხოლო 60 წელზე ზემოთ ქალებში ეს მაჩვენებელი 3.5%-მდე იზრდება.

გენეტიკა მნიშვნელოვან როლს ასრულებს ძუძუს კიბოს განვითარებაში, მაგრამ თქვენ შეგიძლიათ შეამციროთ თქვენი რისკი სხეულის ჯანსაღი წონის შენარჩუნებით, რეგულარული ვარჯიშით, ალკოჰოლის მოხმარების მინიმუმამდე შემცირებით. 50 წელზე უფროსი ასაკის ქალებმა რეგულარულად უნდა გაიარონ მამოგრაფია. თუ უმცროსი ხართ, მაგრამ გაქვთ დადებითი ოჯახური ისტორია, ისაუბრეთ თქვენს ექიმთან იმაზე, ადრე დაიწყოთ თუ არა რეგულარული მამოგრაფიული სკრინინგი. განურჩევლად ასაკისა, ყველა ქალისთვის რეკომენდებულია მკერდის გამოკვლევა სახლში, საკუთარი ხელით თვეში ერთხელ მაინც.

• როგორ იცვლება თქვენი კანი ასაკთან ერთად

50 წლის შემდეგ თქვენი კანის ღრმა ფენაში კოლაგენის ბოჭკოები შეიძლება გახდეს უფრო უხეში და ნაკლებად მოწესრიგებული. ეს ხდის კანს უფრო უხეშს, ნაკლებად ელასტიკურს, რაც ნაოჭებს უფრო ცხადად წარმოაჩენს. პიგმენტის წარმომქმნელი მელანოციტები მცირდება, რაც ხელს უწყობს კანის კიბოს განვითარებას.

ყველაზე მთავარი, რაც კანზე გრძელვადიან ზრუნვასა და ნაოჭების პრევენციას უწყობს ხელს, ეს მზისგან დაცვაა. ასევე, ეცადეთ, ცხელი შხაპის ნაცვლად უფრო გრილი წყლით დაიბანოთ.

• როგორ იცვლება თქვენი თმა ასაკთან ერთად

ასაკთან ერთად თმა თხელდება და ნელა იზრდება. თუ ბოლო დროს თქვენს ჯაგრისზე მეტი ღერი შეამჩნიეთ, არ ინერვიულოთ: თითქმის ყველა განიცდის თმის ცვენას დროთა განმავლობაში, განსაკუთრებით 50 წლის შემდეგ. ჭაღარა 30 წლიდან ჩნდება, თუმცა ზოგს უფრო ადრე, ზოგს - გვიან უჩნდება. ეს გენეტიკასა და ცხოვრების წესზეა დამოკიდებული. ეცადეთ, სწორად შეარჩიოთ მოვლის საშუალებები, არ მოიხმაროთ უხეში ქიმიური ნივთიერებები, დაივარცხნოთ ნაზად, ძალდატანების გარეშე და თმა მაქსიმალურად დიდხანს შეინარჩუნებს ჯანმრთელ იერს.



როდესაც წააწყდებით ამ და სხვა ცვლილებებს, გახსოვდეთ, რომ დროის გასვლას უამრავი სარგებელი მოაქვს. ეს საუკეთესო დროა, საკუთარი თავი პირველ ადგილას დააყენოთ, მოუსმინოთ თქვენს გონებასა და სხეულს, რა გჭირდებათ, რა განიჭებთ სიამოვნებასა და სიხარულს და იცხოვროთ მაქსიმალური ბედნიერებისთვის. თუკი საკუთარი განწყობის ცვლილებას დააკვირდებით, ნახავთ, რომ უფრო კეთილგანწყობილი, მშვიდი და გაწონასწორებული გახდით, რაც საშუალებას მოგცემთ, გადაწყვეტილებები სწორად მიიღოთ. მთავარია, რომ თქვენს ორგანიზმს ხელი შეუწყოთ, ჯანსაღად დაბერდეს, მოერიდეთ შაქრიან და დამუშავებულ საკვებს, რადგან ეს ხელს უწყობს დეგენერაციულ დაავადებებს, როგორებიცაა, დიაბეტი და ალცჰეიმერი. შეზღუდეთ ალკოჰოლი, რამაც შეიძლება გამოიწვიოს ოქსიდაციური სტრესი, რაც ხელს უწყობს დაბერებას. იძინეთ საკმარისად და მართეთ თქვენი სტრესი. დაალაგეთ ურთიერთობები. რაც მთავარია, იყავით აქტიური!