კარგად შერჩეული საცურაო კოსტიუმის მოდელი სხეულს მომგებიანი რაკურსით წარმოაჩენს. გთავაზობთ რამდენიმე წესს, რომელიც ამ რთულ საქმეში დაგეხმარებათ.
საცურაო კოსტიუმის შერჩევა
თავიდან უნდა გაერკვიოთ, თუ რა ტიპის სხეული გაქვთ, და რაც მთავარია - მის ღირსებებსა და ნაკლებში. სპეციალისტები გვირჩევენ, საღად შევაფასოთ ჩვენი სუსტი მხარეები, რათა საცურაო კოსტიუმმა მოხერხებულად დაფაროს ისინი.
საცურაო კოსტიუმი სხეულის ტიპის მიხედვით
ვაშლი
ასეთი ტიპის სხეულის მფლობელებს პუტკუნა ფორმები და გამოწეული მუცელი აქვთ. ამიტომ მათთვის იდეალური ვარიანტია რეტრო. მაღალი ტრუსები შესანიშნავად დაფარავს ზედმეტ მოცულობას და სხეულს ვიზუალურად ქვიშის საათის ფორმას მისცემს. უმჯობესია, მყარი ფორმის ლიფი შეარჩიოთ, რათა მკერდი კარგად დაიჭიროს. თუ მკერდი პატარაა, ფუშ-აფი აუცილებელია სწორი პროპორციების დასაცავად.
ქვიშის საათი
სხეულის იდეალურ ტიპად მიიჩნევა, მაგრამ მისი გაფუჭებაც შეიძლება არასწორი საცურაო კოსტიუმით. წელის გამოსაკვეთად შეარჩიეთ შესაკრავიანი ტრუსები, ლიფი კი ფუშ-აფ სტილში. ასევე, კარგი ვარიანტია ბანდო, ჰალტერი და სტანდარტული ბიკინი-სამკუთხედები.
მსხალი
ეს გახლავთ სხეულის ყველაზე გავრცელებული ტიპი, განსაკუთრებით, 35 წელს გადაცილებულ ქალებში. უმჯობესია, ერთი ფერის დაბალწელიანი ტრუსები შეარჩიოთ, ლიფი კი მკვეთრი, ქვებით მორთული, წვრილი ბრეტელებით, რათა თეძოებიდან ყურადღება გადაიტანოთ.
სწორკუთხედი
ასეთ ტიპთან სიფრთხილის გამოჩენა გმართებთ. შეარჩიეთ ამერიკული ტიპის ტრუსები V-ფორმით, რომელიც ვიზუალურად რელიეფს შესძენს სხეულს. ლიფი კი - კარგი ფუშ-აფ ეფექტით.