მაშინ, როცა 22 წლის მაჰსა ამინი 13 სექტემბერს ოჯახთან ერთად დასავლეთ ირანიდან დედაქალაქში მიემგზავრებოდა, ის პოლიციამ ჰიჯაბის არასწორად ტარების გამო დააკავა. დაკავებიდან რამდენიმე საათში მის ოჯახს შეატყობინეს, რომ ამინი საავადმყოფოში იყო გადაყვანილი, სადაც ის სამ დღეში გარდაიცვალა.
თვითმხილველები ამბობენ, რომ ქალი ნაცემი იყო, რასაც უარყოფს ირანის შინაგან საქმეთა სამინისტრო. პოლიციაში აცხადებენ, რომ ამინი შეუძლოდ გახდა, როდესაც ის სხვა დაკავებულ ქალებთან ერთად პოლიციის განყოფილებაში იცდიდა.
ქალის გარდაცვალებას ირანში საპროტესტო აქციები მოჰყვა. საპროტესტო აქცია გარდაცვლილი მაჰსა ამინის მშობლიურ ქალაქ საყეზში გაიმართა, რომელიც ირანის ქურთისტანის პროვინციაში მდებარეობს. გარდაცვლილი ახალგაზრდის დაკრძალვის ცერემონიაზე მოქალაქეები ახლომდებარე ქალაქებიდანაც ჩავიდნენ. პროტესტმა მალევე მიიღო უფრო მასშტაბური სახე და სოციალურ ქსელშიც გადაინაცვლა. ამ შემზარავი ფაქტის შესახებ სხვადასხვა პლატფორმაზე მსოფლიოს სხვადასხვა ქვეყნიდან არაერთმა ადამიანმა გამოაქვეყნა ვიდეო.
მაჰსა ამინის შემთხვევას გამოეხმაურა საფეხბურთო სამყაროც. გუშინ, 21 ნოემბერს, ინგლისისა და ირანის (6:2) დაპირისპირების დაწყებამდე აზიური ნაკრების ფეხბურთელებმა ჰიმნი არ იმღერეს. ისინი პროტესტის ნიშნად ჩუმად იდგნენ.
ირანელმა ფეხბურთელებმა გამოიჩინეს მამაცობა და რისკზე წავიდნენ, ფეხბურთელებმა ქვეყანაში მიმდინარე სასტიკი მოვლენები დაგმეს და ქალბატონებს სოლიდარობა გამოუცხადეს. ამ ჟესტის ნახვისას ტრიბუნაზე მჯდომი ირანელი ქალი ქომაგი ატირდა, რასაც სოციალურ ქსელში დიდი გამოხმაურება მოჰყვა.
წაიკითხეთ სრულად